عيني تنشد قالت خيرك
ساهر ليلك
حار دليلك
من غالي باعد ياويلك.
عيني قالت..
ساهر واسهورك لاتوّا ...
ناويها سهره صبّاحي...
تدوي واتعاود ف الدوَّه ...
سيل اعيونك جاي بقوّه...
ماهوش امخلّي مطراحي.
رعده يرزم داير دوّه ...
ناتو ضارب هدفه ماحي .
برْقهْ يَشْكع يعمي ضوّه...
ورشةْ لحّام وصلاّحي .
غُزَرْ مطر واشبوبه جوّه ...
يفهمها كان اللمّاحي .
بحرك هايج ...
ضبّبْ جوّا...
شن نحكيلك ضاعن ع الشط مراسيلك.
عيني تنشد ....
خير ادموعك بدادة ع الخد انراها....
حازن مانك كاتم لوعك ...
لأنك طايق يوم بلاها .
درته شور اخرب مشروعك ...
لاتنساك ولا تنساها .
اصبر لين اتجي فى طوعك ...
قول ياسر م الجري وراها .
تدلل عرفاته جوعك ...
ليها ول موّال غلاها .
تبكي سكّابات ادموعك...
كاينّه ما حد ضناها .
ضاعف لين اتعد اضلوعك ...
دوخه ركبت فيك بلاها .
وجهك شاحب هدّى رُوعك ...
رفعاتك لوهام وراها .
كذّابه ماهي من نوعك ...
خارب من لوّل مبناها .
مش كل كلام ايقولولك ...
صادق وامرتب معناها .
صكّر ها الباب ونحكيلك...
وانغنيلك ...
عن غالي زارك فى ليلك .
عيني تنشد.
بقلمي
الصالحين الرفروفي
_19_مايو _2024م
