زاعلات من هم الزمان وكيده
وحيدات مالهن فزاع حاما عنهن
زمانهن امبرم ومالقنش سنيده
اتكونلهن رفيده كي الظروف تكنْهن
زامقات من عدّةْ ظروف عطيبه
تلاقن عليهن عقَّلن معْقلْهن
قاشطات طرشه والأحوال صعيبه
تكتيف وراني ايدينهن رُبطنهِن
سالن امواقيهن هَاطلات سكيبه
لين الوساد امعا الفراش سقنهن
شلال يجري ما الوَنِي ايجيبه
وحتى السدود غِلبِنْ وماشدنهن
يتطافرن بالطفر زادن خيبه
خايبات وامغيب اللي امدجنهن
غايب امخيبهن وماهي عيبه
أن نصبن عليه الطار من يحجرهن
يشفع الله فيهن ويكسر كيده
ظلم الأوقات وكل من عاونهن
ويدُورْ الفلك ليهن ويأخذ بيده
وينهض اللي بارك يزوم جملهن
وننسوا المحنه وايامها العطيبه
ويعودن طرابه ووطنهن يجملهن
