سلم لله دايماً أمرك
إزرع دايماً خير تلقاه
وتوصل للي بتتمناه
وبين الناس مايوم تتهان
وتعيش حاسس دايماً بأمان
اوعي تكون عبد المال
المال عمره ماريح بال
واوعي الدنيا تلعب بيك
وتنسيك حق عليك
اوعي تخون صاحب ليك
في الأزمات كان حواليك
واوعي تآمن يوم لخسيس
علشان أصله أصل رخيص
هتلاقي دايماً له وشين
وعمره لسرك مايبقي أمين
وسهل يبيعك علشان قرشين
واوعاك تاكل حق يتيم
وتعيش انسان طماع ولئيم
وتعيش بالباطل بين الناس
وتفضل بينهم دايماً منداس
في دنيا فانيه ما تسواش
ده النتاش ما بيعلاش
قول الحق وما تنساش
ياواكل حق الناس ببلاش
خليك دايماً راضي بحالك
واوعاك يوم تأذي جيرانك
او يوم تظلم فيه أحبابك
النبي وصي علي سابع جار
ياللي بتأذيه ليل ونهار
ليه للظلم علي طول تختار
ولو كان ربك ستار
ربك يُمهل بس مايِهمل
ياللي للخير دايماً تهمل
خلي رزقك يبقي حلال
ياللي مسعور علي جمع المال
وعمال تنهب يمين وشمال
وإنت ياناسي أبوك وأمك
إللي رضاهم من رضا ربك
ماتنساش فيه جنه ونار
ليه للنار عايز تختار
وياللي بتسرق في الغلبان
وبتزود في الأسعار
خليت مالك كله حرام
وبعد ده كله إزاي هتنام
وانت بتظلم في خلق الله
روح ياشيخ منك لله
خلي قلبك بالخير عمران
وما تخليش بالك حيران
وسلم لله دايماً أمرك
يرتاح بالك ويزول همك
خواطر
أشرف الدغيدي
